Sentencia Penal Nº 109, Audiencia Provincial de Pontevedra, Rec 1032 de 17 de Noviembre de 2000

PROCEDEMENTO ABREVIADO POR CONTRABANDO A sentencia recorrida basea a súa decisión condenatoria en varios indicios: por se atopar no interior do vehículo a súa documentación persoal; por ser o vehículo propiedade da súa noiva, e ser utilizado de xeito habitual por el; o terceiro, por admitir o acusado que o día dos feitos o empregara; e cuarto, por resultar inverosímil o feito do roubo do coche. Estos datos levaron a unha sentencia condenatoria, pois, como ten dito o TC, a carga da proba dos feitos exculpatorios recae sobre a defensa. O feito de que a coartada do roubo do vehículo quede desbotada non pode levar a estimarmos esa coartada frustrada como en elemento de proba en contra do acusado. A equivocación na estratexia defensiva no acusado non pode considerarse máis que iso, unha estratexia, como calquera outra, pero non unha proba incriminatoria. Existe un elemento de proba cunha vehemencia indiciaria de participación do inculpado no feito delictivo: que se atopa no interior do vehículo unha numerosa documentación súa,  mais non é menos certo que ese feito, non é totalmente excepcional. Por outra banda, subtraéuselle ao tribunal un dato transcendente para determinar a autoría do acusado, como é o lugar ou lugares onde foi atopada toda a documentación, pois non é igual que estivese debidamente guardada, a que estivese tirada e espallada. En conclusión, é factíbel que a documentación estivese debidamente gardada dentro do vehículo polo acusado, por este se-lo seu usuario e conductor habitual, ou que este fose utilizado por unha ou unhas terceiras persoas, polo que, ante a incertidume na que se coloca este Tribunal, non cabe outra opción que a de absolvérmo-lo acusado recorrente.