LEI 8/2012, deth 25 de junh, de modificacion des limits e era denominacion dera Resèrva Nacionau de Caça der Alt Pallars - Aran., - Diario Oficial de Cataluña, de 18-07-2012

TIEMPO DE LECTURA:

  • Ámbito: Cataluña
  • Boletín: Diario Oficial de Cataluña Número 6173
  • Fecha de Publicación: 18/07/2012
  • PDF de la disposición
  • Este documento NO tiene versiones

Las versiones catalana y castellana de este documento fueron publicadas en el DOGC núm. 6159, de 28.6.2012.

Es versions catalana e castelhana d'aguest document sigueren publicades en DOGC núm. 6159, de 28.6.2012.

Eth president dera Generalitat de Catalonha

Sigue notòri a toti es ciutadans qu'eth Parlament de Catalonha a aprovat e jo, en nòm deth Rei e d'acòrd tamb çò qu'establís er article 65 der Estatut d'autonomia de Catalonha, promulgui era següenta

LEI

Preambul

Aguesta lei ei frut dera iniciativa legislativa exercida peth Conselh Generau d'Aran e amasse era volontat manifèsta deth municipi de Naut Aran de que s'excludisque eth sòn tèrme municipau dera Resèrva Nacionau de Caça der Alt Pallars - Aran.

Atau donques, er objècte d'aguesta lei ei, per un costat, era exclusion deth tèrme municipau de Naut Aran dera Resèrva Nacionau de Caça der Alt Pallars - Aran, en tot mantier laguens era Resèrva eth territòri dera Val de Boí corresponent ar agraniment que ne hè era Orde deth Departament d'Agricultura, Ramaderia e Pesca deth 22 de junhsèga de 1996, e, de un aute costat, eth consecutiu cambiament dera denominacion dera Resèrva.

Era Resèrva Nacionau de Caça der Alt Pallars - Aran siguec creada per Estat espanhòu eth 1966, per miei der article 1 dera Lei 37/1966, deth 31 de mai, sus creacion de resèrves nacionaus de caça, e agranida per miei d'aguesta Orde. Era fin dera resèrva ère ordenar eth profitament cinegetic dera zòna e preservar determinades espècies animaus de grana valor ecologica e cinegetica.

Totun, d'alavetz ençà, s'a produsit un cambiament ena titularitat des competénces sus aguesta matèria qu'abilite era Generalitat entà aprovar aguesta lei. En efècte, er article 119.1 der Estatut d'autonomia de Catalonha atribuís ara Generalitat era competéncia exclusiva ena matèria de caça e pesca fluviau, e concrète qu'aguesta competéncia includís, en tot cas, era planificacion e era regulacion deth regim d'intervencion administrativa dera caça e dera pesca, dera vigilància e des profitaments cinegetics e piscicòles. Cau rebrembar qu'era prenuda en carga de competéncies exclusives en matèria de caça per part dera Generalitat siguec establida per article 9.17 der Estatut d'autonomia deth 1979.

De un aute costat, era actuau legislacion d'emparament mieiambientau establís un ample catalòg de mesures entà garantir era viabilitat dera conservacion des espècies protegides, e tanben mecanismes entà regular-ne eth profitament cinegetic, que suspassen longament, en eficacitat e eficiéncia, era declaracion dera zòna coma resèrva nacionau de caça. Donques, era modificacion des limits dera Resèrva qu'establís aguesta lei non sonque entre en encastre des competéncies pròpries dera Generalitat, mès que, ath delà, non deteriore era fin perseguida damb era declaracion dera resèrva nacionau de caça.

Article 1

Modificacion des limits dera Resèrva Nacionau de Caça der Alt Pallars - Aran

Se modifiquen parciaument es limits nòrd, sud e oèst dera Resèrva Nacionau de Caça der Alt Pallars - Aran, cossent damb er annèxe.

Article 2

Modificacion dera denominacion dera Resèrva Nacionau de Caça der Alt Pallars - Aran

Se modifique era denominacion dera Resèrva Nacionau de Caça der Alt Pallars - Aran, establida per article 1 dera Lei 37/1966, deth 31 de mai, sus creacion de resèrves nacionaus de caça, que passe a èster Resèrva Nacionau de Caça der Alt Pallars.

Disposicion finau

Entrada en vigor

Aguesta lei entre en vigor londeman d'auer estat publicada en Diari Oficial de la Generalitat de Catalunya.

Per tant, ordeni a toti es ciutadans as quaus sigue d'aplicacion aguesta Lei coopèren ath sòn compliment e qu'es tribunaus e es autoritats as quaus pertòque la hèsquen complir.

Palai dera Generalitat, 25 de junh deth 2012

Artur Mas i Gavarró

President dera Generalitat de Catalonha

Annèxe

Es limits dera Resèrva Nacionau de Caça der Alt Pallars - Aran, abans dera exclusion deth tèrme municipau de Naut Aran, son es que fixen er annèxe dera Lei 37/1966, deth 31 de mai, sus creacion de resèrves naturaus de caça, e era Orde deth Departament d'Agricultura, Ramaderia e Pesca deth 22 de junhsèga de 1996 pera quau s'agranís era Resèrva Nacionau de Caça der Alt Pallars - Aran.

Es limits deth territòri que s'excludís dera Resèrva Nacionau de Caça der Alt Pallars - Aran son es corresponents as limits administratius deth tèrme municipau de Naut Aran, qu'a ua superfícia de 25.286,86 ectares.

Es limits descrits an un perimètre de 97.815 mètres, que, en çò que hè ara delimitacion dera Resèrva Nacionau de Caça der Alt Pallars - Aran -en tot deishar inalterada era delimitacion damb era part dera comarca dera Alta Ribagorça includida ena Resèrva, enes tèrmes que fixe era Orde deth 22 de junhsèga de 1996-, se detalhe ara seguida.

Afectacions dera exclusion deth tèrme de Naut Aran sus es limits dera Resèrva Nacionau de Caça der Alt Pallars - Aran

a) Afectacions en limit nòrd dera Resèrva

Eth limit nòrd dera Resèrva Nacionau de Caça der Alt Pallars - Aran que descriu er annèxe dera Lei 37/1966 se ve afectat pera exclusion deth tèrme municipau de Naut Aran. Eth limit deth tèrme excludit a era descripcion següenta:

Delimitat pera frontèra francoespanhòla, des deth Portilhon d'Albi, en limit entre es tèrmes municipaus de Canejan e Bagergue (tèrme municipau de Naut Aran), enquiath còth plaçat entre eth Tuc dera Gireta e eth Tuc Blanc, que conforme eth limit des comarques deth Pallars Sobirà e era Val d'Aran.

b) Afectacions en limit èst dera Resèrva

Eth limit èst dera Resèrva Nacionau de Caça der Alt Pallars - Aran que descriu er annèxe dera Lei 37/1966 non se ve afectat pera exclusion deth tèrme municipau de Naut Aran.

c) Afectacions en limit sud dera Resèrva

Eth limit sud dera Resèrva Nacionau de Caça der Alt Pallars - Aran que descriu er annèxe dera Lei 37/1966 se ve afectat pera exclusion deth tèrme municipau de Naut Aran. Eth limit deth tèrme excludit a era descripcion següenta:

Delimitat peth limit administratiu entre es comarques dera Alta Ribagorça e era Val d'Aran, des deth Tuc des Estanhets enquiath Gran Tuc de Colomèrs; e tanben peth limit administratiu entre es comarques deth Pallars Sobirà e era Val d'Aran, des deth Gran Tuc de Colomèrs enquiath Pòrt de Ratèra.

d) Afectacions en limit oèst dera Resèrva

Eth limit oèst dera Resèrva Nacionau de Caça der Alt Pallars - Aran que descriu er annèxe dera Lei 37/1966 se ve afectat pera exclusion deth tèrme municipau de Naut Aran, que conforme eth limit èst dera part excludida, e se descriu de conformitat damb era Resolucion GAP/865/2010, deth 15 de març, relativa ara delimitacion entre es municipis d'Alt Àneu e de Naut Aran, publicada en DOGC num. 5598, deth 30 de març de 2010.

Limit èst dera part excludida

Eth limit èst dera part excludida ei delimitat peth limit administratiu entre es comarques deth Pallars Sobirà e era Val d'Aran, des deth còth plaçat entre eth Tuc dera Gireta e eth Tuc Blanc enquiath Pòrt de Ratèra.

Limit oèst dera part excludida

Eth limit oèst dera part excludida conforme eth limit oèst dera Resèrva Nacionau de Caça der Alt Pallars - Aran que descriu era Lei 37/1966, que demore delimitat peth limit administratiu entre eth tèrme municipau de Canejan e eth de Naut Aran, des deth Portilhon d'Albi enquiar Estanh Long de Liat; e tanben peth limit administratiu entre eth tèrme municipau de Vielha e Mijaran e eth de Naut Aran, des der Estanh Long de Liat enquiath Tuc des Estanhets.

(12.193.035)


No hay versiones para esta norma