RESOLUCION de 4 de xunu de 2004, de la Direccion Xeneral de Promocion Cultural y Politica Llinguistica, pola que se convoquen los premios Xosefa Xovellanos de Novela, Xuan M.ª Acebal de Poesia y Enriqueta Gonzalez Rubin de Periodismu. - Boletín Oficial del Principado de Asturias, de 01-07-2004

TIEMPO DE LECTURA:

  • Ámbito: Asturias
  • Boletín: Boletín Oficial del Principado de Asturias Número 152
  • Fecha de Publicación: 01/07/2004
  • Este documento NO tiene versiones

Fechos

Primeru.Fomentar la creatividá lliteraria contribúi ensin dulda a desendolcar el conteníu cultural de la sociedá, sobre manera teniendo en consideranza la importancia de la lliteratura, en cualesquiera de les sos munches manifestaciones, nel nuestru tiempu. Ye persabío, tamién, que la escritura, que surde de la voluntá de creación y comunicación, lleva consigo un importante trabayu personal, una dedicación de tiempu y esfuerzo que, ensin ser midibles económicamente porque el valir propiu de la lliteratura tresciende estes midies, sí que se puen reconocer y promocionar per aciu de los poderes públicos. Poro, la Conseyería de Cultura, Comunicación Social y Turismu del Principáu d’Asturies vien convocando añalmente dellos premios lliterarios empobinaos a consolidar, arriquecer y prestixar la llingua y cultura asturianes.

Segundu.Polo tanto, nel presente añu procede convocar la XXV Edición del premiu Xosefa Xovellanos de Novela n’Asturianu, la X Edición del premiu Xuan M.ª Acebal de Poesía n’Asturianu, y la II Edición del premiu Enriqueta González Rubín de Periodismu n’Asturianu, col enfotu de qu’actuaciones d’esti calter contribúin dafechu a dinamizar l’actividá cultural de la Comunidá Autónoma, y de manera un aspectu perimportante de la mesma como ye’l de la creación lliteraria.

Terceru.Pa la financiación de los mentaos premios hai creitu amañosu y granible nel vixente presupuestu de gastos y féxose el correspondiente documentu de reserva de retención de creitu por importe de 18.000 euros con cargu a l’aplicación presupuestaria 14.03.422R.227.006 (Expte.

1400001851).

Cuartu.Conforme a lo dispuesto nel art. 45.2 de la Resolución de 20 de setiembre de 2001 de la Conseyería de Facienda, pola que s’aprueben les normes sobre xestión, tramitación y réxime de contabilidá na execución del presupuestu de gastos, la Intervención Delegada, en fecha 26 de mayu de 2004, emitió’l correspondiente informe fiscal favoratible.

A estos fechos aplíquense-y estos

Fundamentos de derechu

Primeru.L’artículo 38, apartáu i) de la Llei 6/1984, de 5 de xunetu, del Presidente y del Conseyu de Gobiernu y el artículu 21, párrafu 4 de la Llei 2/1995, de 13 de marzu, sobre Réxime Xurídicu de l’Alministración del Principáu d’Asturies, referente a la determinación de les competencies y facultaes de la Ilma. Conseyera de Cultura, Comunicación Social y Turismu p’adoptar la presente Resolución.

Segundu.L’artículu 41 de la Llei de Réxime Económicu y Presupuestariu del Principáu d’Asturies, testu amestáu, aprobáu pol Decretu Llexislativu 2/1998, de 25 de xunu, tocántenes al artículu 8.1 de la vixente Llei 5/2003, de 30 d’avientu, de Presupuestos Xenerales del Principáu d’Asturies pal 2004, referente a la competencia que-y correspuende a los titulares de les Conseyeríes p’autorizar y disponer los gastos propios de los servicios del so cargu y de los qu’estableza la Llei de Presupuestos Xenerales de cada exerciciu o, nel so defectu, la del anterior exerciciu, hasta la cantidá fixada por ésta.

Arriendes d’ello, en viendo los preceptos llegales mentaos y otros de xeneral aplicación,

R E S U E L V O

Primeru.Convocar, pal añu 2004, los premios:

• Xoxefa Xovellanos de Novela (XXV Edición) n’Asturianu, con una dotación de seis mil (6.000) euros.

• “Xuan M.ª Acebal de Poesía (X Edición) n’Asturianu, con una dotación de seis mil (6.000) euros.

• Enriqueta González Rubín de Periodismu (II Edición) n’Asturianu, con una dotación de seis mil (6.000) euros que se distribúin en dos categoríes: periodismu escritu, dotada con tres mil (3.000) euros, y periodismu audiovisual, dotáu con tres mil (3.000) euros.

Segundu.Aprobar les bases axuntes que van rexir la presente convocatoria y que figuren nel anesu a esta Resolución.

Terceru.Autorizar un gastu por importe de dieciocho mil (18.000) euros con cargu al conceptu 14.03.422R.227.006 del vixente presupuestu de gastos.

Uvieu, 4 de xunu de 2004.La Conseyera de Cultura, Comunicación Social y Turismu, Ana Rosa Migoya Diego.

ANESU

La Conseyería de Cultura, Comunicación Social y Turismu convoca la ventésima quinta edición del premiu de Novela en Llingua Asturiana “Xosefa Xovellanos”

BASES

Primera.Convócase un premiu únicu de Novela en Llingua Asturiana de seis mil (6.000) euros. Nun se pue repartir ente dos obres y, si al xuráu-y paez aparente, podrá dexalu desiertu, según aconseye la calidá de les noveles que se presenten.

El mentáu premiu va tar suxetu a la retención que correspuenda acordies colo establecío na normativa reguladora del impuestu sobre la renta de les persones físiques y otres normatives tributaries.

Segunda.Puen participar toles persones interesaes que nun ganaran na convocatoria anterior d’esti premiu.

Tercera.Les noveles han ser inédites y ensin premiar n’otros concursos. Tarán escrites en llingua asturiana y tendrán un llargor mínimu de setenta y cinco folios a doble espaciu per una cara.

Cuarta.Les obres han presentase, de 9 a 14 hores y de 16.30 a 18.30 hores, de llunes a vienres, nel Rexistru de la Conseyería de Cultura, Comunicación Social y Turismu (c/Sol, 8, Uviéu-33009) hasta’l día 30 d’ochobre, inclusive, del 2004, en dos sobres zarraos onde s’escribirá: Premiu “Xosefa Xovellanos” de Novela, poniendo’l títulu de la obra y el nomatu l’autor; nun sobre meteránse l’orixinal y cuatro copies y nel otru los datos del autor/a (señes, teléfonu y un breve currículum).

Los trabayos puen presentase tamién per corréu, conforme al art. 38.4 de la Llei 30/92, de 26 de payares, de Réxime Xurídicu de les Alministraciones Públiques y del Procedimientu Alministrativu Común.

Si se pide, daráse un documentu qu’acredite l’acoyimientu de la obra. Nesti casu, habrá presentase esti documentu pa recoyer los trabayos non premiaos.

Quinta.El xuráu va tar nomáu pola Sra. Conseyera de Cultura, Comunicación Social y Turismu ente persones relacionaes col ámbitu de la lliteratura asturiana. Va facer de Secretariu/a una persona adscrita a esta Conseyería.

Al fallu del xuráu, al que nun se pue retrucar, va emitise nel plazu de 45 díes dende la data final de presentación d’orixinales.

Sesta.La Conseyería de Cultura, Comunicación Social y Turismu atrócase’l derechu d’espublizar n’esclusiva la primer edición de la obra premiada, dando por pagaos col premiu los derechos d’autor por esa primer edición.

Sétima.Los trabayos non premiaos pue recoyelos l’autor/a o persona autorizada pa ello, nun plazu que nun pasará de tres meses dende la data del fallu del xuráu. En pasando’l plazu mentáu ensin que se recueyan, la Conseyería de Cultura, Comunicación Social y Turismu va poder desanicialos.

Octava.La participación nesta convocatoria supón l’aceptación de les presentes bases.

Novena.Les incidencies que se puean plantegar nos supuestos non previstos nes presentes bases sedrán resueltes pola Sra. Conseyería de Cultura, Comunicación Social y Turismu.

La Conseyería de Cultura, Comunicación y Turismu convoca la décima edición del premiu de Poesía en Llingua Asturiana “Xuan María Acebal” BASES

Primera.Convócase un premiu únicu de Poesía en Llingua Asturiana de seis mil (6.000) euros. Nun se pue repartir ente dos obres y, si al xuráu-y paez aparente, podrá dexalu desiertu, según aconseye la calidá de los orixinales que se presenten.

El mentáu premiu va tar suxetu a la retención que correspuenda acordies colo establecío na normativa reguladora del impuestu sobre la renta de les persones físiques y otres normatives tributaries.

Segunda.Puen participar toles persones interesaes que nun ganaran na convocatoria anterior d’esti premiu.

Tercera.Les obres han ser inédites y ensin premiar n’otros concursos. Tarán escrites n’asturianu y tendrán un llargor mínimu de quinientos versos.

Cuarta.Les obres han presentase, de 9 a 14 hores y de 16.30 a 18.30 hores, de llunes a vienres, nel Rexistru de la Conseyería de Cultura, Comunicación Social y Turismu (c/Sol, 8, Uviéu-33009) hasta’l día 30 d’ochobre del 2004, inclusive, en dos sobres zarraos onde s’escribirá: Premiu “Xuan M.ª Acebal” de Poesía, poniendo’l títulu del trabayu y el nomatu l’autor; nun sobre meteránse l’orixinal y cuatro copies y nel otru los datos del autor/a (señes, teléfonu y un breve currículum).

Los trabayos puen presentase tamién per corréu, conforme l’art. 38.4 de la Llei 30/92, de 26 de payares, de Réxime Xurídicu de les Alministraciones Públiques y del Procedimientu Alministrativu Común.

Si se pide, daráse un documentu qu’acredite l’acoyimientu de la obra. Nesti casu, habrá presentase esti documentu pa recoyer los trabayos non premiaos.

Quinta.El xuráu va tar nomáu pola Sra. Conseyera de Cultura, Comunicación Social y Turismu ente persones relacionaes col ámbitu de la lliteratura asturiana. Va facer de Secretariu/a una persona adscrita a esta Conseyería.

Al fallu del xuráu, al que nun se pue retrucar, va emitise nel plazu de 45 díes dende la data final de presentación de les obres.

Sesta.La Conseyería de Cultura, Comunicación Social y Turismu atrócase’l derechu d’espublizar n’esclusiva la primer edición de la obra premiada, dando por pagaos col premiu los derechos d’autor por esa primer edición.

Sétima.Los trabayos non premiaos pue recoyelos l’autor/a o persona autorizada pa ello, nun plazu que nun pasará de tres meses dende la data del fallu del xuráu. En pasando’l mentáu plazu ensin que se recueyan, la Conseyería de Cultura, Comunicación Social y Turismu va poder desanicialos.

Octava.La participación nesta convocatoria supón l’aceptación de les presentes bases.

Novena.Les incidencies que se puean plantegar nos supuestos non previstos nes presentes bases sedrán resueltes pola Sra. Conseyera de Cultura, Comunicación Social y Turismu.

La Conseyería de Cultura, Comunicación Social y Turismu convoca la segunda edición del premiu de Periodismu en Llingua Asturiana “Enriqueta González Rubín”

BASES

Primera.Convóquense dos premios correspondientes a dos categoríes:

a) Periodismu escritu, pa trabayos publicaos en periódicos y revistes, dotáu con 3.000 euros.

b) Periodismu audiovisual, pa trabayos emitíos en radio o televisión, dotáu con 3.000 euros.

Caún de los premios nun se pue repartir ente dos trabayos, y, si al xuráu-y paez aparente, podrá dexalos desiertos, según aconseye la calidá de trabayos que se presenten.

Los mentaos premios van tar suxetos a la retención que correspuenda acordies colo establecío na normativa reguladora del impuestu sobre la renta de les persones físiques y otres normatives tributaries.

Segunda.Na categoría de periodismu escritu pue participase con trabayos de tema llibre y de cualesquier xéneru (información, crónica, reportaxe, opinión, entrevista, etc.), espublizaos o emitíos ente’l 1 de xineru de 2004 y la data de pieslle d’esta convocatoria, y que nun fueran premiaos n’otros concursos. L’autor o autora, o bien la dirección del mediu onde s’espublizaran, podrá presentar non más de tres trabayos individuales, que tarán escritos en llingua asturiana.

Nun se xulgarán series, secciones o conxuntos, sinón trabayos individuales.

Tercera.Na categoría de periodismu audiovisual pue participase con emisiones radiofóniques o televisives de tema llibre y de cualesquier xéneru (información, crónica, reportaxe, entrevista, documental, etc.), emitíos ente’l 1 de xineru de 2004 y la data de pieslle d’esta convocatoria, y que nun fueran premiaos n’otros concursos. El director o responsable de la emisión, o bien la dirección del mediu onde s’emitiera, podrá presentar non más de tres emisiones a concursu, que tarán falaes en llingua asturiana. Nun se xulgarán series o programes qu’abarquen un periodu de tiempu, sinón emisiones individuales.

Cuarta.Los trabayos o emisiones han presentase, de 9 a 14 hores y de 16.30 a 18.30 hores, de llunes a vienres, nel Rexistru de la Conseyería de Cultura, Comunicación Social y Turismu (c/Sol, 8, 33009-Uviéu) hasta’l día 30 d’ochobre -inclusive- del 2004, nun sobre zarráu onde s’escribirá:

Premiu Periodísticu “Enriqueta González Rubín” colos documentos que siguen: Cinco copies del trabayu impresu yá publicáu, o de la emisión grabada n’audiu o en videu; los datos (señes, teléfonu y breve currículum) de quien presenta’l trabayu, seya o bien l’autor o bien el director de programa o bien el director del mediu (data y llugar de la publicación o emisión).

Los trabayos puen presentase tamién per corréu, conforme l’art. 38.4 de la Llei 30/92, de 26 de payares, de Réxime Xurídicu de les Alministraciones Públiques y del Procedimientu Alministrativu Común.

Si se pide, daráse un documentu qu’acredite l’acoyimientu de la obra. Nesti casu, habrá presentase esti documentu pa recoyer los trabayos non premiaos.

Quinta.El xuráu va tar nomáu pola Sra. Conseyera de Cultura, Comunicación Social y Turismu ente persones arreyaes a los ámbitos del pensamientu y el periodismu asturianos.

Va facer de Secretariu/a una persona adscrita a esta Conseyería.

Al fallu del xuráu, al que nun se pue retrucar, va emitise nel plazu de 45 díes dende la data final de presentación d’orixinales.

Sesta.La Conseyería de Cultura, Comunicación Social y Turismu atrócase’l derechu se reproducir o publicitar la obra premiada, dando por pagaos col premiu los derechos d’autor por esa primer reproducción.

Sétima.Los trabayos non premiaos puen recoyese nun plazu que nun pasará de tres meses dende la data del fallu del xuráu. En pasando’l plazu mentáu ensin que se recueyan, la Conseyería de Cultura, Comunicación Social y Turismu va poder desanicialos.

Octava.La participación nesta convocatoria supón l’aceptación de les presentes bases.

Novena.Les incidencies que se puean plantegar nos supuestos non previstos nes presentes bases sedrán resueltes pola Sra. Conseyera de Cultura, Comunicación Social y Turismu.


No hay versiones para esta norma