Revision. Convenio Colectivo de Empresa de ADMINISTRACION DE JUSTICIA. PERSONAL FUNCIONARIO de Galicia

Este acordo ten por obxecto unicamente fixar o importe do complemento transitorio autonómico (CAT) dos funcionarios ao servizo da Administración de xustiza en Galicia, derrogando exclusivamente nesta materia a Resolución do 31 de maio de 2006 (DOG do 7 de xuño) que continúa vixente nos demais acordos nela recollidos. Dentro destes acordos que continúan vixentes está o previsto no capítulo IV 2) para os funcionarios que prestan servizos en xulgados de instrución ou xulgados de primeira instancia e instrución das cidades da Coruña, Ferrol, Santiago de Compostela, Lugo, Ourense, Pontevedra e Vigo con competencia en materia de violencia sobre a muller, aos cales se lles recoñecen vinte euros máis que ao resto dos funcionarios, dereito que non resulta afectado pola Resolución do 8 de setembro.

Polo exposto, co fin de aclarar as dúbidas que puideran existir, esta dirección xeral

DISPÓN:

Primeiro.-Declarar a vixencia do disposto no capítulo IV 2) do acordo contido na resolución desta dirección xeral do 31 de maio de 2006 (DOG do 7 de xuño) en relación ao importe que corresponde, en concepto de complemento transitorio autonómico en aplicación do artigo 12 do Real decreto 1909/2000, aos funcionarios dos corpos de xestión, tramitación e auxilio xudicial que prestan servizos en xulgados das cidades da Coruña, Ferrol, Santiago de Compostela, Lugo, Ourense, Pontevedra e Vigo con competencia en materia de violencia sobre a muller.

Segundo.-En consecuencia, recoñecer aos ditos funcionarios a cantidade de 20 € por riba da sinalada na Resolución do 8 de setembro de 2008 (DOG do 17 de decembro).

Esta cantidade aboaráselle con efectos retroactivos desde o mes de xaneiro de 2009.

Santiago de Compostela, 12 de febreiro de 2009.

Begoña Santos Fernández

Directora xeral de Xustiza