Sentencia Penal Nº 18, Audiencia Provincial de Pontevedra, Rec 2 de 19 de Junio de 2001

PROCEDEMENTO SUMARIO POLO DELITO DE HOMICIDIO O acusado atopábase facendo un valado no fundo da súa propiedade, e nun momento determinado fixo acto de presencia o seu convecino co que tiña malas relacións, despois de soster unha breve discusión entre ámbolos dous, o acusado, portando na man unha foz  procedeu a golpealo repedidamente, causándolle lesións que curaron aos 415 días, precisando tratamento médico e cirúrxico. Os feitos que se declaran probados constitúen un DELICTO DE LESIÓNS con utilización de instrumento perigoso. A Sala, non chega á necesaria convicción de que o acusado golpeara ao prexudicado coa intención de rematar coa súa vida, entendendo que actuou co só propósito de lesionalo, ainda que o instrumento empregado era apto para causa-la morte. Mais existen outros feitos e circunstancias que poñen en franca tea de xuízo ese animus letal; dunha banda, non houbo nigunha actitude verbal ou de xestos ou ademáns da que poida inferirse ese propósito mortal; e doutra banda, nin as partes corporais da víctima afectadas polos golpes, nin as propias características das feridas, amparan a tese homicida. Todo isto leva a rexeita-la condena polo delicto de homicidio en grao de tentativa que lle é imputado polas Acusacións, Pública e Particular. A defensa do acusado no trámite dos informes no acto do xuízo oral, invoca a lexítima defensa, e o arrebato e a obcecación, como causas modificativas da responsabilidade criminal. Esta Sala considera totalmente orfa de proba a lexítima defensa, tanto como eximente plena, como eximente incompleta, como simple atenuante. Atopándose  máis orfa -se cabe- a circunstancia de arrebato e obcecación. Nin o propio acusado, nin así testemuñas fan manifestación ningunha sobre ese estado, nin tan sequera foron interrogadas sobre o mesmo. Concorre a atenuante simple de confesarlle ás autoridades a infracción solicitada polo Ministerio Fiscal, posto que houbo un recoñecemento franco, cabal e substancial dos feitos, e da súa participación nos mesmos, contribuíndo con esta actitude colaboradora a normal e pronta acción da xustiza.