Última revisión
Dictamen de Consello Consultivo de Galicia 681 de 29 de octubre de 2003
Relacionados:
Órgano: Consello Consultivo de Galicia
Fecha: 29/10/2003
Num. Resolución: 681
Cuestión
Reclamación de responsabilidade patrimonialResumen
Reclamación de responsabilidade patrimonial interposta por dona V. S. N., pola fractura dun pé debido ás malas condicións nas que se atopaba un sumidoiro.
Organismo: Concello de Culleredo (A Coruña).
Letrado: López Paz
Propuesta: Desestimatoria
Conclusion: Desfavorable
Relator: Moure Mariño
Contestacion
ANTECEDENTES
1.- Con data 12.6.02, dona V. S. N. presenta un escrito ante o Concello de Culleredo no que, logo de relatar que saíndo do seu
domicilio rompera un pe nun sumidoiro que estaba en malas condicións, solicita que lle sexan aboados os danos e prexuízos
derivados do exposto.
Posteriormente, con data 12.9.02, a interesada presenta un novo escrito, ampliando os feitos relatados e formulando unha reclamación
por responsabilidade patrimonial da antedita entidade local, solicitando unha indemnización de 2.489,94?.
2.- Instruído o corresponde expediente de responsabilidade patrimonial, con data 11.09.03 a súa instructora formulou proposta
de resolución en sentido desestimatorio da reclamación.
3.- O expediente de razón foi remitido, para preceptivo dictame deste Consello Consultivo de Galicia, polo Ilmo. Sr. alcalde-presidente
do Concello de Culleredo, tendo entrada neste organismo o día 3.10.03.
4.- Os demais antecedentes dedúcense do contido do dictame.
CONSIDERACIÓNS
Primeira.-
Sométese a dictame deste Consello Consultivo, como quedou reflectido nos antecedentes, unha proposta de resolución correspondente
a un expediente administrativo incoado polo Concello de Vigo, no que, por un particular, se interesa o recoñecemento do dereito
ó percibo dunha indemnización por danos e perdas. O dito dictame encádrase nas competencias definidas polo artigo 11, j) da
Lei 9/1995, do 10 de novembro, do Consello Consultivo de Galicia, e polos artigos 10 e 17.1, e) do seu regulamento, aprobado
por Decreto 282/2003, do 22 de maio, segundo os que debe ser consultado preceptivamente aquel nos supostos de reclamación
en concepto de indemnizacións por danos e perdas.
Segunda.-
O expediente sobre o que se solicita emisión de dictame suscita un caso de responsabilidade patrimonial das administracións
públicas que, como tal suposto, vén regulado basicamente polo artigo 106.2 da
da Lei 30/1992, do 26 de novembro, de réxime xurídico das administracións públicas e do procedemento administrativo común
(en adiante LRXPAC), e polo Regulamento dos procedementos das administracións públicas en materia de responsabilidade patrimonial,
aprobado polo Real decreto 429/1993, do 26 de marzo.
Terceira.-
O carácter obxectivo da responsabilidade extracontractual das administracións públicas, é o froito dunha elaboración da doutrina
e a xurisprudencia. Dise que é unha responsabilidade de resultado, é dicir, que pode nacer con independencia da mediación
de culpa, neglixencia ou ilegalidade, e, en consecuencia, pode ser esixida polos particulares polo simple feito de que estes
sufran no seu patrimonio un dano, prexuízo ou lesión. É suficiente con que poida demostrarse que o dano se produciu como consecuencia
do funcionamento normal ou anormal dos servicios públicos, agás nos casos de forza maior, nos que se considera que a causa
productora dos feitos, en canto que imprevisible, e aínda que previsible, inevitable, excede da responsabilidade esixible
ós responsables públicos.
Cuarta.-
Centrada en termos conceptuais a institución da que tratamos e entrando a coñecer do fondo do asunto suscitado na reclamación,
en primeiro lugar hai que dicir que do expediente -e en concreto dos partes médicos xuntados- resulta debidamente acreditada
a realidade das lesións sufridas pola reclamante, de xeito que se constata a existencia dun dano efectivo, individualizado
e avaliable economicamente.
Deste modo cúmprese o primeiro e esencial presuposto, mais non é suficiente, para declara-la responsabilidade, pois cómpre,
como segundo e decisivo argumento, verifica-la existencia dunha relación causal directa e inmediata entre dito dano e a actuación
administrativa que supostamente, en canto factor eficiente, opera determinantemente na orixe do menoscabo.
Á hora de analiza-la controvertida cuestión do nexo de causalidade hai que partir da regra xeral, acollida xa por este Consello
noutros dictames (entre eles no núm. 30/00), segundo a cal é esixible ós viandantes o autocontrol da súa propia deambulación,
obrigación esta que exclúe toda responsabilidade da administración cando é crebada, por introducirse, neste caso, un elemento
estraño na relación xurídica controvertida, cal é o da culpa da víctima, circunstancia que, cando reúne o requisito da exclusividade
na vinculación co dano padecido, enerva toda responsabilidade da Administración, tal e como estableceu de xeito reiterado
o Consejo de Estado (entre outros no dictame do 1 de xullo de 1971) e a propia xurisprudencia do Tribunal Supremo (St. 08.03.67,
25.01.74 ou 05.11.74).
Nembargantes, como xa indicou este Consello Consultivo no seu dictame núm. 270/01, o control da propia deambulación non pode
ser elevado a regra absoluta e categórica á hora de excluír unha eventual responsabilidade da Administración; a súa pretendida
incondicionalidade, antes ben, vese necesariamente modalizada polo xogo do principio de confianza dos peóns nas condicións
de seguridade das vías, beirarrúas e beiravías polas que transitan. Deste modo, a constatación dun desaxeitado estado de conservación
daquelas, cando se traduza na existencia de obstáculos non apreciables polos viandantes co emprego da dilixencia esixible
-como concreción da regra do autocontrol da deambulación- dará lugar á obxectivación dun vínculo que enlace o funcionamento
do servicio público en xogo co lesivo resultado final producido.
Nesta orde de consideracións, e polo que ó presente suposto atinxe, hai que indicar que a Administración nega non so a concorrencia
de ámbolos dous requisitos aludidos, senón que tampouco acepta que se teña demostrado pola accionante que a caída ocorreu
no lugar e circunstancias por ela relatados sendo así que esta é unha carga probatoria que sobre ela recae.
O thema probandi que, deste xeito, se suscita demanda facer unha somera consideración sobre o grao de verosimilitude esixible a quen debe asumir
unha carga probatoria como a presente.
Así, tal e como este Consello Consultivo xa recollera noutros dictames, entre outros e principalmente o núm. 148/97, hai que
contar con que, nos supostos coma no presente nos que resulta obxectivamente dificultoso, por parte de quen inicialmente ten
a carga de achega-los medios probatorios necesarios, xerar no xulgador a convicción absoluta de que os feitos ocorreron tal
e coma por el se describen, créase una situación de certa indefensión, que, na medida do posible, é preciso evitar. Debe procurarse
por iso que situacións coma as descritas non constitúan un obstáculo insalvable no tocante a obter un certo grao de certeza
sobre estes, cando nas ditas situacións concorren un mínimo de elementos de verosimilitude que nos permitan chegar sequera
a unha convicción sobre os ditos feitos.
Así, o Tribunal Supremo, consciente das dificultades probatorias que se presentan neste tipo de reclamacións, lembra que toda
actividade probatoria, consiste en ser un medio de acreditación dos feitos para levar ó tribunal á convicción da súa existencia
e comporta unha actividade de reconstrucción histórica, pois refírese a acontecementos xa ocorridos. Non pode esixirse que
esta reconstrucción sexa real e actual en termos absolutos, senón que ten que levarse a cabo ás veces mediante as referencias
que poidan considerarse aceptables de conformidade cós principios que subministra a sa crítica (por todas, sentencia do 21.09.98).
Pois ben, a este respecto e conforme a tales parámetros podemos dicir que do resultado de tódalas probas incorporadas ó expediente
é dado aprecia-la xustificación suficiente por parte da interesada en torno á verosimilitude do relato de feitos que alega.
Neste sentido, hai que indicar que, certamente, as testemuñas propostas por ela son veciñas e coñecidas da interesada, mais
rexeitar de plano a fiabilidade dos seus testemuños, suporía tanto como situar a interesada no trance de demostrar que a súa
caída foi presenciada por terceiras persoas coas que ningún vínculo lle une, ou aínda máis, esixir que a caída se produza
en presencia das ditas persoas, sometendo á reclamante á superación dunha sorte de carga probatoria diabólica, xerando daquela
unha situación de indefensión que na practica conlevaría o valeiramento da institución resarcitoria para o caso de seguirse
unha interpretación extensiva do rigorismo probatorio.
Do mesmo xeito hai que entender que existe acreditación suficiente acerca do deficiente estado de conservación do sumidoiro,
como así se desprende do feito de que os policías locais procedesen á sinalización da instalación logo do accidente, para
ser aquel substituído dous meses máis tarde. Tal consideración vese aboada, ademais, polas fotografías aportadas ó expediente,
que foron examinadas pola policía local, que comprobou in situ a autenticidade da realidade plasmada nela, así como polas declaracións das testemuñas, que abundan no criterio do deficiente
estado do sumidoiro.
Deste xeito, constátase a existencia dun defecto na conservación da beirarrúa, non reparado nin sinalizado polos servicios
municipais senón cando o accidente xa se producira, e que entrañaba un risco para a seguridade dos viandantes, risco actualizado
no accidente da interesada que reclama. A deficiencia apuntada entraña un deficiente funcionamento do servicio público e leva
consigo, seguindo a doutrina do Tribunal Supremo, unha modalización da exclusividade do vínculo entre o dito servicio e o
dano padecido. En efecto, a xurisprudencia entende (STS do 12.05.98) que a nota da exclusividade do vínculo entre o funcionamento
do servicio e o dano producido debe ser entendida en sentido relativo e non absoluto, pois se esa nota pode esixirse con rigor
en supostos danosos acaecidos por funcionamento normal, nos de funcionamento anormal o feito da intervención dun terceiro
ou nunha concorrencia de causas imputables unhas á Administración e outras a persoas alleas incluso ó propio prexudicado,
impoñen criterios de compensación ou atemperación da indemnización ás circunstancias do caso. Así mesmo, o Tribunal Supremo
ten dito -sentencia 04.10.99- en relación a esta circunstancia enervadora de responsabilidade, que para que sexa apreciable
é necesario que exista ?intencionalidade da víctima na producción ou padecemento do dano, ou a gravísima neglixencia desta, sempre que estas circunstancias foran determinantes da existencia da lesión e a conseguinte obriga de soportala?. O dito órgano xurisdiccional, en sentencia do 26.10.00, tamén mantivo, nun suposto próximo ó estudiado, que, aínda que
no caso de autos non era apreciable a existencia de culpa da víctima, a dita circunstancia, de estar presente, non supón necesariamente
a ruptura do nexo de causalidade.
Quinta.-
Neste punto da análise e partindo das consideracións anteriores, procede entrar no estudio do segundo dos requisitos apuntados
como condicionantes para a apreciación de responsabilidade, o control da propia deambulación, que presupón a exclusión de
neglixencia no comportamento da víctima do dano.
Débese sinalar ó respecto, que no presente caso a deficiencia existente na beirarrúa, que xeraba un risco para os viandantes,
non era unha traba oculta, inapreciable para o camiñante, pois nas propias fotos xuntadas apréciase o desnivel que producía
o sumidoiro, e se ben tampouco se trataba dun escollo ostensible e palmar, parece claro que, empregando unha dilixencia media,
en condicións normais, si era salvable, tanto máis se temos en conta que a dita instalación estaba situada fronte do portal
da vivenda da interesada, polo que é procedente a apreciación dun certo reproche de culpabilidade da víctima -con base no
antedito-, o que sitúa na súa esfera de imputación parte da responsabilidade derivada dos feitos.
Tal consideración, polo demais, non supón descoñece-lo criterio xurisprudencial, sostido reiteradamente polo Tribunal Supremo
(sentencia do 4.10.00, entre outras) e seguido por este Consello Consultivo (por todos, dictame 6/02) de que non sería obxectiva
a responsabilidade na que o seu recoñecemento estivera condicionado a probar que quen padeceu o prexuízo actuou con prudencia.
Tal é así porque, no presente caso, demostrada a manifestación ó exterior da irregularidade da beirarrúa, e constatada a responsabilidade
da Administración polo deficiente estado daquela, a cabal explicación do accidente require, necesariamente, a concorrencia
dun certo despiste de quen o padece, sendo presumible, daquela, unha deficiente aplicación da dilixencia debida por existir
entre o dato certo -a manifestación exterior da irregularidade na beirarrúa- e aquel que se presume -o despiste do viandante-,
un enlace preciso e directo segundo as regras do criterio humano, tal como esixe o artigo 386 da Lei 1/2000, de axuizamento
civil.
En consecuencia, existindo un certo reproche de culpabilidade na actuación da víctima, aquel non é de entidade tal que destrúa
o nexo de causalidade anteriormente verificado, porque, seguindo a tese obxectivista acuñada pola xurisprudencia do Tribunal
Supremo -sentencia do 27.10.98, entre outras- ámbalas dúas circunstancias constitúen unha concorrencia de factores que, de
non existir, terían evitado o dano.
Daquela, o procedente é realizar un reparto paritario da carga lesiva, debendo ser indemnizado polo Concello de Culleredo
o 50% do dano, mentres que o 50% restante deberá ser soportado pola accionante, como consecuencia xurídica aparellada á súa
parte de responsabilidade.
No tocante ó quantum da indemnización, a Administración entende que non foi probado pola accionante o feito de estar de baixa nun emprego nembargantes
tamén é certo que a interesada non incluíu na súa reclamación o pretium doloris correspondente ó dano padecido como consecuencia da fractura do metatarsiano, polo que entendemos equitativo fixar o importe
dos danos na contía de 2.000 euros, e daquela, dado que o Concello debe resarcir o 50% da lesión, é procedente estimar en
parte a reclamación e aboar á interesada a cantidade de 1000?.
CONCLUSIÓN
Por todo o anteriormente exposto, a Sección Primeira do Consello Consultivo de Galicia, por unanimidade de tódolos seus membros
dictamina:
?Que informa desfavorablemente a proposta de resolución á que o presente expediente se refire, procedendo a indemniza-la interesada
na contía de 1.000 ??.